Flora kommune har vedteke å bygge ein skatepark, lokalisert ved Flora ungdomsskule (FUS) og sentralidrettsanlegget. Arbeidet med å få på plass ein skatepark har pågått i mange år. I sentrumsplanen frå 2012 står det at skal leggast til rette for ein skatepark i Florø sentrum. Plasseringa er no vurdert på ny, og det er vedteke at parken skal leggast rett utanfor bykjerna. Dette er eit område med mykje aktivitet, dag og kveld, heile året.
Vi ønskjer framtidsretta og kreative løysingar for skateparken, og vil derfor invitere til eit ope dialogmøte for leverandørar. Målet er stimulere til innovasjon, og å legge til rette for eit meir behovsretta produkt. Dette er knytt til NHO/KS/DIFI Nasjonalt program for leverandørutvikling, les meir om dette her: www.leverandorutvikling.no
Gjennom møte ønskjer Flora kommune å opprette ein dialog med marknaden tidleg i prosessen for å få gode innspel til arbeidet med å utvikle ein funksjonell kravspesifikasjon, samt for å stimulere leverandørbedriftene til utvikling og innovasjon.
Skatemiljøet i Florø har eit stort behov for eit anlegg som beskytter mot regn og vind. Miljøet er i dag prega av at dei rampene dei har i dag ligg vêrutsett til, og at området dei har, ofte blir nytta til andre formål. Rampene står utanfor ungdomshuset Haffen midt i byen.
Flora kommune ønskjer eit nytt anlegg som har gode funksjonelle og miljøvennelege løysingar, og som dessutan forholder seg til området det ligg i t.d. i forhold til støydempande tiltak og tilpassing i landskapet. Delar av anlegget må ha overbygg som beskytter mot regn og vind. Kunnskap som kjem fram under dialogmøte vil påverke val av løysingar for det nye prosjektet.
Dialogkonferansen vert 20. januar 2016 kl 10:00 i Florahallen.
Sjå Invitasjon for meir informasjon.